香港電臺廣播劇-故事的故事系列之《十七號枱》(蔡浩樑、劉蓮、譚月好、李司政、張婉君、譚樹強)

香港電臺廣播劇-故事的故事系列之《十七號枱》(蔡浩樑、劉蓮、譚月好、李司政、張婉君、譚樹強)

首播:2010年9月12日22點至24點

格式:wma
集數:1

故事的故事-十七號枱

香港電台版權所有

(1)
男:你有無聽過「孟婆」呢個人呢?孟婆、地獄、奈何橋、迷魂湯呢?呀……你終於記得喇!

孟婆,聽講佢係地獄嘅年長女神,係「遺忘」嘅管理人員!孟婆從來都唔會回憶過去,又唔想未來,後來上天任命孟婆做「遺忘之神」,要所有鬼魂投胎之前,一定要忘記自己嘅前世……孟婆佢喺池塘、河水收集藥草,做成一種又鹹、又甜、又酸、又苦又辣嘅孟婆湯,飲咗之後,就會無晒記憶,重新做人!

做人,有時最痛苦就係記得,如果唔駛死都可以忘記一啲痛苦、憤怒、怨恨、失望、被出賣嘅事,你話幾好!可惜便利店係唔會有「孟婆湯」賣!點解會記得咁清楚?因為曾經付出、曾經相信、曾經深愛……如果可以選擇忘記,仲有係可以選擇忘記邊一秒、邊一分鐘、邊一個鐘、邊一日、甚至邊一年……可能無咁多人與人之間嘅悲劇發生!你會想記住呢個人,恨佢一生一世,定抑或選擇忘記一部分記憶,留低嘅係美好時光,留低嘅係一個燦爛笑容呢?

如果係我…我會…

(雨聲+雷聲)

(撞車聲+男女呻吟)

(救傷車聲)

男+女:呀……救命呀!

(2)

(救傷車聲)

(急症室儀器聲)

新聞報道:晚上八時發生交通意外,一架私家車懷疑因天雨路滑,加上超速行駛,私家車失控撞埋山,車上男司機同女乘客,頭部受到猛烈撞擊,出現昏迷嘅情況,由救傷車送院急救……

男:我每一次拍拖都當係初戀,我以為咁樣會認真啲,會維持段感情耐啲,當然我嘅估計係錯喇!我大大話話都初戀咗四、五次……不過今次應該算最耐……佢叫阿芳,拍拖之後梗係唔會咁叫佢喇!通常都係Baby、Honey、Sugar、豬豬咁叫喇!我都係,我叫佢做Bi Bi,佢叫我都係Bi Bi!

(3)
男:你仲記唔記得我地係點識㗎!?我記得……

(海浪聲)

其實我係唔識游水㗎!嗰日個沙灘唔係好多人,我一個人落到水,亂咁游咗一陣……

女:先生……先生……靚仔!

男:你……你嗌我呀?

女:係呀!係我嗌你呀!你可唔可以幫吓手呀?

男:幫吓手?

女:你見唔見到你前面……浮吓浮吓呢……

男:哦!黃色浮吓浮吓……

女:麻煩你呀!我甩咗件泳衣呀!

男:吓!

男:佢就係阿芳,即係Bi Bi!嗰年三四月,香港有沙士,死咗好多人!

(急症室儀器聲)

護士:(大叫)醫生,病人醒喇!

(4)
醫生:點呀!?覺得點呀?

男:呀……個頭有啲痛!

醫生:會㗎!會痛㗎!你撞親個頭吖嘛!

男:咦,我女朋友呢?

醫生:對唔住……

男:吓!醫生……

醫生:你唔駛咁緊張!我係話「對唔住…我過嚟睇咗你先!一陣先睇佢!」

男:哦……嚇死我!

醫生:你呢……撞車嗰陣個頭就受到碰撞,有腦震盪,照過晒!暫時無腫、無積水,無乜大礙!咁係好㗎!宜家你醒番再檢查其他嘢!

(電筒開關聲)

醫生:望住我隻手指,眼跟住郁……左邊!……右邊!上……下!ok!宜家坐起身,得唔得!?

男:得!(床單聲)

醫生:姑娘……幫幫手!

護士:係醫生! 敲手腳聲)

醫生:唔……

男:哎吔!

醫生:識得哎吔即係好喇!有反應喇!暫時係咁喇!休息多啲!

男:哦!

醫生:洗多啲手!啲豬流感好勁呀!知唔知!?

男:乜嘢……豬流感!?

醫生:墨西哥爆發嗰隻呀!新H1N1呀!成年喇!上年五月中呀!!

男:新H1N1?

護士:香港封咗酒店呢!

男:酒店?

醫生:疫苗呢?嘥咗三億嘅流感疫苗呀?記唔記得呀?

男:我唔記得……

醫生:咁……今年係邊年呀?

男:2009囉! (雷聲)

(5)
男:原來……我唔見咗成年嘅記憶!點解會咁?

有醫生話:如果個頭受傷,會因為腦震盪而完全記唔起事發經過,有時會幾秒就無事,有時會幾分鐘,有時可能會好長……

人嘅記憶原來好奇妙!記憶原來同大腦嘅海馬區有密切關係!海馬區?究竟係個腦邊度呢?

女:短暫性全面遺忘症……

短暫性近記憶障礙……

我都係唔記得成年,究竟做過啲乜?發生過乜嘢事?

男:我失咗憶……

女:我失咗憶……

男:我唔見咗一年嘅記億!

女:一年嘅記億!



仔……睇吓我!記唔記得我係邊個?

男:媽,唏!唔好攪我個頭喇!我記得你係邊個!樓下個八婆仲掙你麻雀數吖嘛!



呀……係喇!好囉!你仲記得阿媽!點呀?醫生話幾時出得院呀?

男:快㗎啦!咦!阿芳呢?



吓….唔知噃!!

男:你唔去探吓佢!



唓!你自己唔去探佢!

男:我郁到,我過咗去喇!快啲幫我問吓佢,幾時出院!?跟住一齊番屋企!



番屋企?番邊個屋企呀?

男:哈……梗係我屋企喇!阿芳同我一齊住吖嘛!



吓……仔!你……真係……唔記得晒!?

男:唔係全部,唔記得一年之嘛!



但係…上年……

(7)

女:(開門聲+鎖匙聲)

咪住!

男:做乜呀?

女:你真係唔聽伯母話呀?佢叫你唔好帶我番嚟噃!

男:咁呢度係你同我嘅屋企,點解唔可以番嚟!?

女:但係……我同你都一齊唔記得上年發生過乜嘢事……

男:有乜事唧!?我哋死過翻生,應該更加珍惜對方!

女:唔…… (開門聲)

男:嘩!番到屋企喇!

女:嘩……好舒服呀!

男:(坐梳化聲)都係自己屋企最舒服……

女:咦……點解……?

男:做乜呀?

女:點解屋企隻隻窗都裝晒窗花嘅!?(搖鎖聲)仲鎖晒添!

男:係喎!以前好似無㗎!

女:咦……我哋啲相呢?

男:係喎!以前呢度有幅好大嘅合照㗎!係我哋第一次去雪山嗰次影?

女:點解屋企宜家一張相都無嘅?

男:去晒邊呢?

女:(走入房再出廳聲)間房……

男:做乜呀?

女:間房入面……我啲衫唔見晒!

男:吓……

女:好似……我根本唔喺度住……

男:無理由!我哋同居咗咁多年……

女:究竟……上年發生咗乜嘢事?

(8)
男:究竟上年我同佢發生過乜嘢事?喺我嘅記憶入面,我同佢一齊,係好開心嘅!

阿芳,佢宜家瞓喺我身邊,佢瞓得好冧!一切同以前一樣!我要知道發生乜嘢事?於是,我攞咗本記事簿出嚟!我有一個習慣,就係記低嚟緊有乜嘢做!入面記低咗上年我同佢去過啲乜嘢地方?做過啲乜?

(9)
女:上年二月十四號……

男:情人節喎!

女:上面寫住「南生圍」!

男:哦……南生圍食飯!

女:唔……咁我哋仲唔……

男/女:出發!


(開車聲)

我哋決定揸車去南生圍,我哋希望去搵番我哋失去咗嘅記憶!我好有信心,我哋一定可以搵到嘅!

(10)


(行車聲)

(不耐煩)點呀?搵到未呀!?

男:咁記事簿淨係寫住南生圍,又無寫住南生圍邊度?梗要搵吓喇!

女:咁仲有幾耐呀!?

男:咪睇緊地圖囉?

女:不如問吓人喇?

男:邊有人唧!?

女:頭先村口咪有囉,你又唔問?

男:費時煩人喇!

女:人哋有話煩咩!

男:喂……咁你即係話我搵唔到唧!?

女:唉!攞本地圖嚟喇!

男:唓!你咁叻自己搵囉!

女:你搵唔到就發我脾氣!

男:你發我脾氣先㗎!

女:係你話話要嚟南生圍㗎!

男:你有份「UP」頭㗎!

女:我見你又話搵記憶,又呢又路,我「就」你咋!

男:哦……我想搵記憶!你唔想!!

女:係呀!我—唔—想吖!

男:咁唔好搵囉!!以後都唔搵囉!

(11)
男:你哋有無聽過龜兔賽跑呢個故仔呢?我有另外一個龜兔跑嘅故仔!!兔仔又聰明又跑得快,有一日,兔仔喺烏龜面前又唱歌又跳舞,懶風騷咁「漏」烏龜同佢賽跑,烏龜見兔仔咁招積就應承佢!佢哋要鬥快跑到去棵樹度!

兔仔跑咗一半就瞓咗覺,烏龜係咁爬,係咁爬,佢唔理兔仔,過埋佢之後,終於第一個跑到去棵樹度!呢個時候兔仔先至頭耷耷咁跑到嚟!於是烏龜同佢講:「兔仔你太自以為是!你輸咗喇!」兔仔呢個時候,面帶笑容,又有少少怕醜咁同烏龜講:「烏龜,其實我係特登引你注意,叫你同我賽跑,因為我想你可以跑過嚟望吓棵樹!我一早已經喺棵樹度刻咗三個字,希望你見到㗎!」烏龜望吓棵樹,果然有三個字─── 我愛你!原來兔仔由頭到尾都係想同烏龜示愛,根本就唔係想賽跑!

男同女有時都係咁!你想對佢好咩!叫佢唔好咁做,提吓佢,佢以為你想鬧佢!管佢!你以為愛佢,買嘢送俾佢,佢話你嘥錢!

女:佢話你嘥錢!你特登唔出聲,等佢話事,佢話你無主見!你幫佢搵,佢話你唔尊重佢!你叫佢浪漫啲,佢話你批評佢唔浪漫!你叫佢小心啲,佢話你對佢無信心!根本……

男:根本……『我愛你』呢三個字!一早己經刻咗喺個心度!係佢……

女:係佢!

男/女:睇唔到!

(12)
男:為咗搵番我失去咗一年嘅記憶,我哋跟住記事簿寫低過去一年做過嘅嘢,我哋照做多一次!希望可以搵番一啲感覺……我哋去過巴黎…… (飛機聲)

男:喂,呢件衫幾靚吖!

女:唔……咁老土!

男:咁……呢件吖!

女:嘿!乜你有見過我着呢隻色咩?

男:就係見你無!先叫你試吓着吖嘛!

女:我唔着呢隻色,梗係因為我唔鍾意喇!你咁都唔明!

男:又係你話要啲新鮮感吖嘛!

女:新鮮感!?係同你講,叫你諗多啲新鮮嘢做!唔好咁悶!

男:哦,又係我錯!

女:一向都係㗎喇!

男:咁你自己行喇!夠晒新鮮喇!

女:喂!你行去邊呀?!

男:過去一年,究竟我哋發生過乜嘢事?

(沖廁聲)

女:你去完廁所呀?

男:係呀!

女:點解你次次都要拎起塊廁板,跟住又唔放番低佢㗎!無厘手尾!

男:咁我唔想整污糟塊廁板吖嘛!我覺得我好有手尾!

女:你可以放番低佢㗎!

男:點解要放吖!?

女:我要用吖嘛!

男:咁你用先放低,用完又拎番起佢囉!

女:點解呀?

男:咁乾淨啲囉!

女:我唔覺喎!!

男:梗係喇!個廁所唔係你洗,係我呀!

女:你唔錫我!

男:係呀,我唔錫你,我宜家就去錫塊廁板,以後都唔錫你喇!你滿意喇!

男:有時係唔係唔記得反而係一種幸福呢?

(收綫聲)

男:拜拜!

女:邊個打嚟?

男:個同事之嘛!亞John呀,你見過喇!

女:打嚟做乜?

男:佢問候吓我之嘛

女:呢輪成日晚晚都有人打嚟嘅?

男:大小姐,咁我病吖嘛!病咪多人打嚟問候,關心吓我囉!

女:好,攞個電話嚟!

男:做乜呀?

女:我打番俾─── 亞John!

男:你又發乜神經呀?

女:頭先嗰個係女人!

男:乜女人呀!亞John呀!男人名嚟㗎!

女:你唔打過去一定係心虛!

男:我費事啋你!

女:攞個電話嚟呀!唏……

男:喟…….哎吔!搶乜呀!?

女:(一巴)嘿……

男:你做乜打我呀?

(13)


(夜晚聲)

你坐喺露台邊做乜呀?好危険㗎!

女:無嘢呀!點呀!?今日覆診,醫生有乜嘢講呀?

男:無乜嘢講!都係咁喇!

女:即係點呀?

男:一切正常!係繼續短暫性失憶囉!你呢?

女:差唔多囉!

男:如果……

女:如果乜呀?

男:如果我哋真係唔記得番起咁點算呀?

女:你好想知點解間屋裝晒窗花……你好想知點解我會搬走咗咩?

男:唔…係!

女:你同我一齊唔開心咩?

男:梗係唔係喇!

女:會唔會……?

男:唔會!

女:不如問吓你亞媽喇?

男:唔問!

女:或者……我同你!

男:唔好再討論呢個話題得唔得呀!?

女:……本記事簿仲有乜嘢寫呀?

男:我哋……撞車嗰日原本book咗枱食飯!

女:邊度呀?

男:樂士佛台間意大利餐廳17號枱!

女:17號枱!?

男:係呀!指定17號枱!

女:17號枱咁熟嘅!?

男:聽日去食完咪知囉!

(14)
男:為咗令到今次飯可以有個好結局!我決定做足功課!我上網查清楚間餐廳食乜嘢?開支乜嘢酒?着件乜嘢衫去呢?不過,最奇怪一樣嘢係……17號枱!上面餐廳介紹有行好細嘅字寫住「如果係情侶,千祈唔好book 17號枱!」

原來依間有二十幾年歷史嘅意大利餐廳,佢嘅17號枱有一個紀錄!就係,所有坐喺呢張枱食過飯嘅情侶,百分之九十五都分手收場,有啲甚至一食完飯就分手!真係咁邪?!如果係咁,喺我失憶之前,點解失仲要指定book呢張17號枱食飯呢?

(15)

老闆:(餐廳聲)Hi! 歡迎兩位!今晚想飲啲乜嘢先?

男:有無澳洲Shiraz……

老闆:有!

男:Mc Claren Valley 04年嘅Shiraz!

老闆:無問題,麻煩兩位等一等。(步聲)

女:呢度要早半年前book枱?

男:係啩!我見記事簿寫低book咗食飯,咪再打嚟問可唔可再book,老闆話ok!

女:但係,點解呢張17號枱咁怪嘅?

男:唔……

女:零零叮叮同其他枱分得好開!你睇其他枱啲枱布都係紅色,淨係呢張係黑色……

(酒杯、開酒、倒酒聲)

老闆:麻煩試吓……

男:唔……ok!

老闆:慢用!我轉頭再過嚟……(步聲)

女:(飲酒)唔……你估我哋撞車嗰日點解要嚟呢度食飯吖?

男:可能你好想嚟呢度食飯,我咪book囉!

女:你記得咩?

男:我唔記得!不過,我諗呢個可能性都好大!你知一向都係我就晒你㗎喇!

女:但係……我唔記得!其實……出事到宜家,我哋一齊搵咗咁耐,以為可以搵番一啲開心嘅記憶,我越嚟越覺得,我哋搵落去,會越嚟越唔開心……會唔會……

(電話響)

男:唔好意思!邊個搵我呢?喂……

老闆:(電話內)唔好意思,我係老闆,你可唔可以暫時行開一陣,我有啲嘢想同你傾……

男:吓?

(16)
男:老闆,你叫我過嚟bar枱做乜呀?一陣間俾我女朋友睇到,以為我哋做乜呀?

老闆:唔好意思!我唔知係唔係我多事,不過我覺得我有必要問一問你

男:吓……我唔係好明噃!

老闆:你打電話嚟話想book番17號枱食飯……

男:係吖!咁我哋之前撞車,無食到,咪再嚟過囉!

老闆:你知17號枱……

男:我知,每一對坐過喺呢張枱食飯嘅情侶都會分開吖嘛!

老闆:我知道你點解要book呀!不過點解,你同你女朋友好似好恩愛咁嘅!

男:點解唔恩愛呀!我哋……咪住!你話你知點解我要book 17號枱?

老闆:係呀!你撞車前打嚟book枱!我問你係唔係同你女朋友嚟!你話係,我原本叫你唔好坐17號枱!你話一定要!

男:我話一定要!?

老闆:係呀!你話一定要同女朋友坐17號枱!

男:我……

老闆:我開頭都話唔好喇!你“求”我幫吓手!話乜嘢頂佢唔順但係又唔知點開口同佢講!仲傳真張報紙俾我睇添!

男:乜嘢報紙呀!?

老闆:嗱!咪呢張囉!(報紙聲)

男:一名女子昨日凌晨懷疑從大廈天台游繩落九樓男事主單位…

新聞報道:一名女子昨日凌晨懷疑從大廈天台游繩落九樓男事主單位,用螺絲批撬開窗口潛入單位內,用刀指嚇男事要求復合,雙方後來發生糾纏驚醒男事主母親,混亂中女子用刀斬傷男事主母親……

(回憶窗花及無相片無衫片段)

男:斬傷男事主母親……

老闆:你話想同佢分手!但係又驚再刺激佢!求我俾你哋坐17號枱搏一搏……但係今日我見你地兩個好到不得了,我覺得奇怪,咪問吓你之嘛!

男:我……原同佢一早分咗手!我…唔記得!

(17)
男:喺好耐好耐之前,人,不論係男人定係女人,只係為咗維持生命,解決飢餓嘅問題……佢哋要愛就愛,鍾意就鍾意,唔鍾意就唔鍾意……慢慢,男人同女人都開始變,一個變成一隻水牛、一個變成一隻蝴蝶,變到好難互相溝通!水牛向蝴蝶拍尾巴,係想打招呼,定係想拍死佢呢?

蝴蝶喺水牛面前飛吓飛吓,係想引水牛開心,定係嘲笑緊佢唔識飛呢?

究竟你幾時係開心鍾意,幾時係發脾氣想走!?

係唔係因為大家都唔識得幾時開口,又唔識得幾時收口呢?

女:做乜呀?你行咗去邊呀?

男:無嘢呀!

女:問你又唔講呀?

男:唔……係!我…..去搵老闆之嘛!

女:做乜呀!?

男:我問佢可唔可以搬第二張枱之嘛!不如…我哋唔好坐17號枱喇!好唔好呀?

女:唔!好呀!

男:記憶抑制學提過,人係可以有選擇咁去忘記一啲人或事,通常人係會唔記得一啲自己唔想保留嘅一啲記憶!當發生過一啲極度傷心嘅事之後,佢會將呢段時間發生呢一切一切完全忘記得一乾二淨,呢啲就係「選擇性失憶」!我唔知我呢一年嘅記憶,係因為撞車,定抑或係我自己選擇忘記!我淨係知我同一年前嘅佢再開始過!如果每一次唔開心都可以忘記!再嚟過!我記得嘅只係開心,你話幾好呢?

《完》

劇本創作:蔡浩樑

聲音演出:蔡浩樑飾演 男

劉 蓮 飾演 女

譚月好飾演 亞媽

李司政飾演 老闆、新聞報道員

張婉君飾演 新聞報道員、護士

譚樹強飾演 醫生

主演:蔡浩樑、劉蓮、譚月好、李司政、張婉君、譚樹強等。

打包下載鏈接:

香港電臺-故事的故事20100912-十七號枱.wma

发表回复

您的电子邮箱地址不会被公开。