香港電臺廣播劇-故事的故事系列之《日蝕》(蔡浩樑、談月好、劉蓮、張婉君、李司政)

香港電臺廣播劇-故事的故事系列之《日蝕》(蔡浩樑、談月好、劉蓮、張婉君、李司政)

格式:wma
集數:1

日蝕
故事的故事-日蝕

劇本創作:蔡浩樑
版權:香港電台

(1)


太陽比地球濶四百倍,太陽同地球之間距離比起地球同月球之間嘅距離,又係多四百倍,當太陽、月球同地球之間成一條直線嘅時候,我地會見到太陽俾月球遮住,淨係得番一個金色嘅圓圈,呢個時候就係 - 日蝕,2010年7月11號,當南非世界盃決賽西班牙對荷蘭嘅時候,咁啱有一次 - 日蝕!

(2)


我係一個15歲嘅好男仔,一個好到唔知點形容嘅好男仔!我成績好,成日做運動,放學就即刻番屋企,最多有時候就去吓圖書館……我唔打機,唔溝女,唔睇鹹書,最多睇吓靚模寫真啲相,我唔食煙、唔「隊」嘢……夠哂好喇!我覺得我已經做得好好!



喂!幫我攞啲衫去洗衣機洗喇!



哦!



跟住「浪」埋佢!



哦!



佢係我阿媽,我諗佢都覺得我幾好、幾乖仔…除咗一樣嘢……



你可唔可以唔好淨係「哦」一聲,乜都淨係「哦」!你好唔鍾意同阿媽講嘢咩?



我習慣咗「哦」!叫我食飯……「哦」!叫我讀書……「哦」!叫我生性啲……「哦」!因為我知道,只要「哦」,亞媽就唔會「鵝」我咁多!!

(3)


亞媽,點解要考咁多試嘅?



唔考試邊有書讀?



我鍾意讀書咪得囉!



讀完考吓你,先知你有無認真讀書嘛!



我肯定已經好認真,可唔可以唔考試?



唔駛考試,你咪唔讀囉!



我唔會!



老師唔知嘛!



我同你知咪得囉!唔駛考試喇!?



我都唔知你有無讀書?



媽,咁你即係唔信我唧!



你要我信咪考試囉!



咁我可唔可以去考試,但係唔讀書吖!



唔得!



淨係讀書,唔考試哩!



唔得!



又唔考試,又唔讀書哩!



唔得!



媽……你搵乜嘢呀?



我搵緊枝棍呀!(行雷)



類似咁嘅對話實在太多,我決定以後乜嘢都只係用「哦」去答阿媽!

(4)


我愛唔愛我阿媽呢?不如等我講個故仔俾你地聽……

你地有無聽過過「伊狄帕斯王」呢個人呢?伊狄帕斯係古希臘神話入面一個人物,佢嘅爸爸係萊奧斯國王,佢媽媽柔卡斯塔皇后,咁嘅家庭背境,肯定好幸福喇!你地錯喇!

伊狄帕斯未出世,天神已經話比佢國王爸爸聽,呢個仔會危及佢嘅生命同埋王國,結果點呢?當然一出世父王就想殺咗佢喇!不過,伊狄帕斯佢命硬死唔去!仲長大咗添!



(碗筷聲)仔,食飯喇!



哦!



成晚望住個天做乜唧?傻吓傻吓咁!

(5)


一出世老豆就要殺佢,不過伊狄帕斯唔死得,仲快高長大,生得英俊不凡!有一日佢騎住馬(騎馬聲),喺一條小路撞到一架馬車,仲同車上人嘈起上嚟,伊狄帕斯一刀、兩刀、三刀,殺晒車上人……原來其中一個係位猛人,係一位國王……亦即係佢老豆萊奧斯國王!(行雷聲)唔駛驚,大家唔駛驚!因為伊狄帕斯根本唔知佢殺咗佢親生爸爸!



仔,食完未呀?食得咁鬼慢㗎?快啲喇!食完……



洗碗吖嗎!?



唔駛你洗喇!你去……騎馬喇!(騎馬聲)

(6)


唏…唏吔!跑快啲!點解我殺咗嗰個馬車上男人之後……我個心好似有啲又酸又苦嘅感覺?

女怪獸

哈……哈……



你就係嗰隻專門問人問題,唔識答就吞咗佢落肚嘅「女人頭獅子身」怪物?

女怪獸

無……錯!我問你,你答唔到,我就吞咗你!



即管放馬過嚟!(馬叫聲)

女怪獸

你尋日、今日同聽日最愛邊個?



吓……我最愛邊個? (海浪聲)



尋日,喺呢個沙灘,我記得啲沙有少少黑黑地,當時我學緊游水……



係喇!慢慢嚟!伸直對腳喇!



我飲咗好多啖海水,又鹹又苦……



拍吓對腳喇!



佢着住泳衣,企喺度,用手托住我,教我游水……佢係我阿媽!尋日,我最愛佢!

(7)女怪獸:你尋日、今日同聽日最愛邊個?哈……



今日……我最愛邊個?

(步聲)隔離位個女仔,我跟縱過佢番屋企…

樓下便利店收銀個女仔,我日日都去望吓佢……

學校美術科miss陣香水味我仲記得……

Carol 本寫真我收埋咗喺床下底……

今日……我最愛邊個?



仔呀!問你字呀?呢個保養個「養」字點寫呀!「養」字呀!?



今日……我最愛邊個?



「養」字點寫呀!?你唔係唔識吖嘛?「養」喎!



今日……



仔呀!講真吖!你有無諗過「養」我唧!?



今日……我最愛佢!

(8)


嘿!你呢隻女人頭獅子身嘅怪物,問題我就答完喇,受死喇!

(刀劍聲)

女怪獸

呀………(慘叫)



好喇!無咗呢隻怪獸,呢個國家嘅人民就安全喇!(人群歡呼聲)



伊狄帕斯殺咗隻怪獸,救咗國民,仲被推舉成為國王添!

就喺登基嗰日,佢見到一個好靚好靚嘅女人,伊狄帕斯馬上就鍾意咗佢,仲想娶佢為妻添!呢個咁靚嘅女人,就係柔卡斯塔皇后……亦即係伊狄帕斯嘅親生媽媽!(行雷聲)

(9)
男男

呀…(大叫)點解呀?

可憐嘅伊狄帕斯當知道自己真正身份之後,真係生不如死,佢大力咁跳,又大力咁叫……佢怨恨自己親手殺死自己嘅老豆,仲娶埋自己親生阿媽做老婆……點可能發生咁嘅事?!最後,伊狄帕斯頂唔順,癲咗,仲用力咁挖自己對眼出嚟!跟住自殺!究竟邊個最可憐?

放棄自己個仔,但又俾個仔殺死嘅國王?

俾人殺咗老公,又嫁番俾個兇手,仲要係自己個仔嘅皇后?

定抑或係一個乜都唔知,但係又錯到不得了嘅仔仔呢?

(10)


心理學家嘅精神分析論提到,「伊狄帕斯情結」,男仔有一種殺死父親,擁有母親嘅傾向,呢種就係「戀母情意結」!

(笑)如果係咁……我應該好愛我媽!

(11)女怪獸:哈……尋日、今日同聽日你最愛邊個?你仲有「聽日」未答噃!?



你呢隻「女人頭獅子身」怪物,你想我答你,除非你幫我實現一個「願望」,到時我會識得答你!

女怪獸

好!我應承你!你講你嘅願望!



我要同我阿媽,互相調轉!

女怪獸

哈……好!

(12)


所謂調轉,喺日頭我會變老咗,仲要係變老咗好多!咁我阿媽呢?佢梗係變番好似細路囡咁喇!但係當太陽落下之後,一切就會變回正常,佢繼續可以鬧我、管我同點我做嘢!你話係咪好好玩呢?

哈哈…

母:仔呀!

男:咩事呀?

後生母:仔呀!

男:(老聲)唔好嘈呀!

(13)後生母:(公園聲)仔呀!咁猛太陽嚟公園做乜呀?



(老聲)我約咗人打波呀!

後生母

乜嘢人呀?係唔係壞人呀!?



喂,你問還問!你摸我啲頭髮做乜呀?

後生母

咁我係你亞媽喎!



家陣日光日白,你把聲、你個樣點都唔似我亞媽喇!你想阻住我,你就死!

後生母

唏!到夜晚你就死!

(14)


果然,到夜晚,無咗太陽之後,我就死喇! (鞕打、慘叫聲)

(15)


喺日頭,我好自由,好開心!我可以去做好多以前我唔敢做嘅嘢!打機、睇三級片、追女仔、甚至去酒吧,但係一到夜晚我又變番我阿媽嘅仔、一個細路仔……我就好唔開心!於是我做咗一個決定,帶亞媽去旅行……

(16)


喺芬蘭,有一個地方叫拉普蘭,呢個地方有一個特色,就係不論日頭定夜晚都係陽光普照,即係24小時太陽都唔會落山……只要我帶亞媽嚟呢個地方,咁我就掂晒喇!

後生母

仔呀!行快啲喇!上機喇!去芬蘭喇!(飛機聲)

(17)


「千湖之國」嘅芬蘭,風景真係好靚……

後生母

仔呀,你估我唔知點解你要嚟芬蘭咩?



係因為呢度嘅太陽唔會落山!

後生母

太陽唔落山,你亞媽我就變細路,你就做大人!嘿!你做乜個樣咁尷尬呀,仔!你內疚呀!唔駛喎!其實我都有啲開心㗎!



開心?

後生母

第一,我家陣咁後生,皮膚又滑又白,點會唔開心!第二,我……可以見到你大個咗個,原來……你大個咗咁靚仔!我梗高興喇!



媽,我帶你去睇一個湖吖!

後生母

叫乜嘢名?



芬蘭第一大湖── 塞馬湖。

(18)


帶阿媽去塞馬湖,因為我想保持宜家呢個狀態,我想保持我自由自在嘅生活,唯一嘅辦法就係…亞媽……我要佢永遠消失!

後生母

嘩!個湖好靚呀!(水聲)



估唔到2010年7月11號……

亞媽,對唔住呀!唏!(拍擊聲)

後生母

仔……你做乜推我落去呀!? (特別音效── 日蝕)

新聞報道

當南非世界盃決賽進行緊嘅時候,一次罕見嘅日全蝕喺南太平洋出現,過程歷時大約五分鐘!

幾千名嘅科學家、記者同遊客,一齊觀賞呢個天文現象……

太陽俾月球遮住,淨番一個金色嘅圈……

後生母

仔……你做乜推我落去呀?(水聲及雀仔聲)



喺阿媽跌落嗰陣,我同阿媽一齊面向湖,就係我地一齊跌落去嘅時候,由水面嘅倒影,我見到日蝕,白天突然之間變咗夜晚……就喺嗰一剎那,我見到阿媽,由細路女慢慢……慢慢變番四十幾、五十歲,額頭嘅縐紋左一條、右一條咁爬番出嚟!眼袋由無變有,魚尾紋由無變有,眼淚由無變有……

後生母


仔……亞媽唔會怪你!好快就會變番有陽光,你自由喇!



望到佢面上嘅縐紋,原來亞媽佢已經好老,我亞媽係為咗我而老咗好多!

(19)


女人頭獅子身怪獸你問我尋日、今日同聽日,我最愛邊個?

我而家可以答你喇!

劇本創作:蔡浩樑

聲音演出:蔡浩樑 飾演 亞仔

談月好 飾演 亞媽

劉蓮 飾演 後生亞媽 同埋 女怪獸

張婉君 李司政 飾演 新聞報導員

《完》

劇本創作:蔡浩樑

聲音演出:蔡浩樑 飾演 亞仔

談月好 飾演 亞媽

劉蓮 飾演 後生亞媽 同埋 女怪獸

張婉君 李司政 飾演 新聞報導員

主演:蔡浩樑、談月好、劉蓮、張婉君、李司政等。

打包下載鏈接:

香港電臺-故事的故事20100822-日蝕.wma

发表回复

您的电子邮箱地址不会被公开。